Kanz al-Ummal

٥٣٧٠۔۔۔ اللہ تعالیٰ نرمی والے ہیں اور ہر چیز میں نرمی پسند کرتے ہیں، ہر عاجزی کرنے والے غم گین دل کو چاہتے ہیں جو لوگوں کو بھلائی کی بات سکھاتا ہو اللہ تعالیٰ کی عبادت کی طرف بلاتا ہو اور ہر سخت اور غافل کو ناپسند کرتے ہیں جو پوری رات سوتا رہے اور اللہ تعالیٰ کا ذکر نہیں کرتا اور نہ یہ جانتا ہے کہ اللہ تعالیٰ اس کی روح واپس کرتے ہیں یا نہیں ؟ الدیلمی عن ابی الدرداء (رض))

٥٣٧١۔۔۔ اللہ تعالیٰ نرمی والے ہیں اور نرمی کو چاہتے اور پسند کرتے ہیں اور نرمی پر وہ اعانت کرتے ہیں جو سختی پر نہیں کرتے۔ (طبرانی فی الکبیر، ابن عساکر عن ابی امامہ )

٥٣٧٢۔۔۔ اللہ تعالیٰ اپنی (عطا کردہ) گنجائشوں پر عمل کرنے کو ایسے ہی پسند کرتے ہیں جیسے اپنی نافرمانیوں کو ترک کرنے کو پسند کرتے ہیں۔ (الشیرازی فی الالقاب عن ابن عمر)

٥٣٧٣۔۔۔ اللہ تعالیٰ نرمی کو چاہتے اور پسند کرتے ہیں اور اس پر وہ کچھ عطا کرتے ہیں جو سختی پر عطا نہیں کرتے۔ (طبرانی فی الکبیر عن ابی امامہ)

٥٣٧٤۔۔۔ اللہ تعالیٰ نرمی پر وہ کچھ عطا کرتے ہیں جو سختی پر عطا نہیں کرتے۔ (طبرانی فی الکبیر عن جریر)

٥٣٧٥۔۔۔ تمہارا بہترین دین وہ ہے جو انتہائی آسان ہو۔ (مسند احمد عن محجن بن الادرع، مسند احمد عن الاعرابی)

٥٣٧٦۔۔۔ تمہارا یہ دین بےحد مضبوط ہے اس میں نرمی سے داخل ہو، اس واسطے کہ (قافلہ سے) کٹ جانے والا نہ کسی سواری کو باقی چھوڑتا ہے اور نہ کسی زمین کو قطع (طے) کرسکتا ہے۔ (العسکری فی الامثال عن علی)

٥٣٧٧۔۔۔ یہ دین انتہائی مضبوط ہے اس میں نرمی سے داخل ہو، اپنے آپ کو اللہ تعالیٰ کی عبادت سے متنفر نہ کر، کیونکہ کٹ جانے والا نہ سواری چھوڑتا ہے اور نہ زمین طے کرتا ہے۔ (بزار، بخاری مسلم العسکری فی الامثال عن جابر وضعف)

٥٣٧٨۔۔۔ یہ دین بےحد مضبوط ہے اس میں نرمی سے داخل ہو، اللہ تعالیٰ کے بندوں کے لیے اللہ تعالیٰ کی عبادت ناپسند نہ کرو، کیونکہ (سفر سے) کٹ جانے والا نہ سفر کرسکتا ہے اور نہ کسی سواری کو باقی چھوڑ سکتا ہے۔ (بیہقی فی شعب الایمان عن عائشہ (رض))

٥٣٧٩۔۔۔ یہ دین مضبوط ہے اس میں نرمی سے داخل ہو، اپنے نفس میں عبادت کا بغض پیدا نہ کر، کیونکہ کٹ جانے والا نہ سفر کرسکتا ہے اور نہ سواری چھوڑتا ہے ایسے شخص کی طرح عمل کر جس کا گمان ہے کہ وہ کبھی نہیں مرے گا، اور اس شخص جیسا خوف رکھ جسے ڈر ہے کہ کل مرجائے گا۔ (بیہقی فی شعب الایمان، بخاری مسلم و العسکری فی الامثال عن ابن عمرو وفی لفظ یظن انہ لن یموت الاھرما)