Kanz al-Ummal

44403 جب آدمی شادی کرلیتا ہے اس کا نصف دین مکمل ہوجاتا ہے اسے چاہیے کہ باقی نصف دین کے متعلق اللہ تعالیٰ سے ڈرتا رہے۔ رواہ احمد بن حنبل عن انس۔ کلام : حدیث ضعیف ہے دیکھئے الشذرۃ 938 وکشف الخفائ 1432

44404 زوجین کی آپس میں خوش طبعی اللہ تعالیٰ کو بہت پسند ہے اس کے بدلہ میں اللہ تعالیٰ ان کے لیے اجر وثواب لکھتا ہے اور انھیں رزق حلال نصیب فرماتا ہے۔ رواہ ابن عدی وابن لال عن ابوہریرہ (رض) ۔ کلام : حدیث ضعیف ہے دیکھئے ضعیف الجامع 1659 ۔

44405 دنیا عارضی سامان زندگی سے اور نیک بیوی سے بڑھ کر اس سامان زندگی میں کوئی چیز افضل نہیں۔ رواہ النسائی ابن مزحہ عن ابن عمرو۔۔ کلام : حدیث ضعیف ہے دیکھئے ضعیف الجامع 2049

44406 تم میں سے جس شخص کو قدرت حاصل ہو وہ شادی کرے چونکہ یہ نظریں نیچی رکھنے کا بہترین ذریعہ ہے اور پاکدامنی کا بہترین باعث ہے اور جو شخص قدرت نہ رکھتا ہو وہ روزے رکھے یہ اس کے لیے پرہیزگاری کا بہترین سامان ہے۔ رواہ النسائی عن عثمان

44407 نکاح میری سنت ہے جس نے میری سنت پر عمل نہ کیا وہ مجھ سے نہیں ہے شادیاں کرو تاکہ قیامت کے دن میں کثیر امت ہونے پر دوسری امتوں پر فخر کرسکوں۔ جو شخص طاقت رکھتا ہو وہ نکاح کرلے اور جو نکاح کی طاقت ن رکھتا ہو وہ روزے رکھے چونکہ روزے رکھنا اسے حرام کاری سے بچاوے گا۔ رواہ ابن ماجہ عن عائشہ

44408 اے نوجوانوں کی جماعت تم میں سے جو شخص لوازمات مجامعت کی استطاعت رکھتا ہو وہ شادی کرلے چونکہ نکاح کرنا نظریں نیچی رکھنے کا بڑا ذریعہ ہے اور شرمگاہ کو زیادہ محفوظ رکھتا ہے اور جو شخص نکاح کی استطاعت نہ رکھتا ہو وہ روزے رکھے چونکہ روزے رکھنا حرام کاری سے بچنے کا بڑا ذریعہ ہے۔ رواہ احمد بن حنبل ومسلم والبخاری عن ابن مسعود

44409 تمہارے اوپر نکاح لازم ہے اور جو شخص نکاح کی استطاعت نہ رکھتا ہو وہ روزے رکھے چونکہ روزے رکھنا حرام کاری سے بچنے کا بہترین ذریعہ ہے۔ رواہ الطبرانی والضیاء عن انس

44410 تقویٰ کے بعد مومن کو کوئی چیز نفع نہیں پہنچاتی جتنا کہ نیک بیوی پہنچاتی ہے۔ اگر اسے حکم کرتا ہے وہ اس کا حکم بجا لاتی ہے اگر اس کی طرف دیکھتا ہے وہ اسے خوش کردیتی ہے اگر اس پر قسم کھالے وہ اس کی قسم پوری کردیتی ہے اگر وہ اس سے غائب ہوجائے تو وہ اپنی جان اور اس کے مال میں خیر خواہ اور دیانتداری رہتی ہے۔ رواہ ابن ماجہ عن ابی امامۃ۔ کلام : حدیث ضعیف ہے دیکھئے ضعیف ابن ماجہ 408 واسنی المطالب 1230

44411 ہم نے تمہاری دنیا سے کچھ نہیں لیا سوائے تمہاری عورتوں کے۔ رواہ الطبرانی عن ابن عمر۔ کلام : حدیث ضعیف ہے دیکھئے ضعیف الجامع 5003

44412 مسجد کی طرف تمہارا جانا اور گھر والوں کی طرف واپس لوٹنا دونوں (عمل) اجر وثواب میں برابر ہیں۔ رواہ سعید بن المنصور عن یحییٰ بن یحییٰ الع نسائی مرسلاً ۔ کلام : حدیث ضعیف ہے دیکھئے اللؤ المرضوع 5090 المصنوع 303