Kanz al-Ummal

17807 ۔۔۔ رسول اکرم (صلی اللہ علیہ وآلہ وسلم) اپنی ذات میں شاندار اور لوگوں کے نزدیک بھی شاندار اور عظیم ترین انسان تھے ۔ آپ کا رخ زیبا چودھویں کے چاند کی طرح چمکتا تھا ، میانہ قد سے قدرے طویل قامت تھے اور لانبے قد والے کی طرح نہ تھے ، سر اقدس بڑا اور مناسب تھا ۔ سر کے بال گھنے اور قدرے گھنگھریالے تھے ۔ اگر سر کے بالوں میں از خود بسہولت مانگ نکل آئے تو نکال لیتے ورنہ جب کنگھی میسر ہوتی تو اس وقت نکالتے ۔ آپ کے سر اقدس کے بال زیادہ سے زیادہ کانوں کی لو سے متجاوز تھے ۔ آپ کا رنگ نہایت چمکدار تھا ، کشادہ پیشانی کے مالک تھے ۔
آپ کی ابروئیں باریک لمبی ، بالوں سے بھری ہوئیں اور ایک دوسرے سے جدا تھیں ۔ دونوں ابروؤں کے درمیان ایک رگ تھی جو غصہ کے وقت پھڑکتی تھی ۔ آپ کی ناک بلندی مائل تھی ۔ اس سے ایک نور اور (روشنی) بلند ہوتی تھی ۔ (اور حقیقت وہ روشنی ناک کی اپنی چمک دمک تھی ) جس کی وجہ سے ناک بلند محسوس ہوتی تھی آپ کی ریش مبارک گھنی تھی ۔ آپ کے رخسار مبارک نرم تھے گوشت لٹکے ہوئے نہ تھے آپ کا دہن مناسب کشادہ تھا آپ کے سامنے کے دندان مبارک باریک آبدار اور قدرے کھلے کھلے تھے سینے سے ناف تک بالوں کی ایک باریک لکیر تھی ۔ آپ کی گردن مبارک خوبصورتی میں خالص چاندی کی جیسی گردن تھی ۔ آپ کے تمام اعضاء مناسب پر گوشت اور گٹھے ہوئے تھے ۔ آپ (صلی اللہ علیہ وآلہ وسلم) کا شکم مبارک سینے کے برابر تھا اور آپ کا سینہ چوڑا اور برابر تھا اور آپ کا سینہ چوڑا اور کاندھے مبارک بڑے اور فراخ تھے آپ کے جوڑ پر گوشت مضبوط بالوں سے عاری اور خوبصورت تھے ۔ لبہ (سینے پر ہارپڑنے کی جگہ) سے ناف تک بالوں کا ایک باریک خط تھا اس کے علاوہ پستان اور شکم مبارک بالوں سے صاف تھا ۔ بازو اور شانے مبارک پر بال تھے ۔ اونچا سینا تھا کلائیاں دارز تھیں کشادہ ہتھلیاں تھیں ۔ دونوں ہاتھ اور پاؤں پر گوشات تھے انگلیاں مناسب لمبی تھیں۔ پاؤں کے پنجوں اور ایڑیوں کے درمیان کی جگہ شگاف تھا چلتے وقت زمین پر یہ حصہ نہ پڑتا تھا ۔ یعنی تلوے گہرے تھے ۔ دونوں پاؤں یوں ہموار اور صاف شفاف تھے کہ پانی ان پر ٹھہرتا نہیں تھا جب آپ چلتے تو قدم مبارک قوت سے اکھاڑتے تھے اور گویا جھکتے ہوئے قدم مبارک اٹھاتے تھے آہستہ اور نرمی کے ساتھ چلتے تھے ۔ کشادہ کشادہ قدم اٹھاتے تھے جب آپ چلتے تو گویا بلندی سے پستی کی طرف اتر رہے ہیں جب آپ کسی طرف متوجہ ہوتے تو کن انکھیوں سے نہیں بلکہ پورے سراپا کے ساتھ متوجہ ہوتے تھے آپ کی نظریں پست رہتی تھیں آسمان سے زیادہ زمین کی طرف نظریں زیادہ مرکوز رہتی تھیں ۔ آپ کا زیادہ دیکھنا صرف ملاحظہ فرمانا ہوتا تھا۔ (یعنی گھور کر مسلسل نہ دیکھتے تھے) آپ صحابہ کرام (رض) کے آگے ن چلتے تھے اور جو آپ کو ملتا آپ سلام میں پہل کرتے تھے ۔ (ترمذی فی الشمائل الکبیر للطبرانی شعب الایمان للبیھقی عن ھند بن ابی ھالہ)

17808 ۔۔۔ حضور (صلی اللہ علیہ وآلہ وسلم) گوری رنگت کے مالک تھے گویا چاندی سے ڈھالے گئے ہیں اور بال مبارک آپ کے گھنگریالے تھے۔ (ترمذی فی الشمائل عن ابوہریرہ (رض))

17809 ۔۔۔ حضور اقدس (صلی اللہ علیہ وآلہ وسلم) مائل بہ سرخی گوری رنگت والے تھے ، آپ کی آنکھوں کی پتلی انتہائی سیاہ اور دراز پلکیں تھیں ۔ (البیھقی فی الدلائل عن علی (رض))

17810 ۔۔۔ آپ صاف شفاف گوری رنگ مائل بہ سرخی والے تھے ۔ آپ کا سر اقدس بڑا اور خوبصورت تھا ، چمکدار پیشانی اور ابروؤں کے درمیانی کشادگی اور دراز پلکوں کے ساتھ حسین چہرے کے مالک تھے (البیھقی فی الدلائل عن علی (رض))

17811 ۔۔۔ حضور اکرم (صلی اللہ علیہ وآلہ وسلم) سب سے زیادہ حسین اور خوبصورت اور سب سے زیادہ اچھے اخلاق کے مالک تھے ، نہ بہت زیادہ لمبے اور نہ پست قد تھے ۔ (بلکہ لوگوں کے درمیان چلتے ہوئے معجزانہ طور پر سب سے زیادہ وجیہہ اور قد آور معلوم ہوتے تھے) ۔ (بخاری ، مسلم عن البراء (رض))

17812 ۔۔۔ حضور اکرم (صلی اللہ علیہ وآلہ وسلم) فداہ ابی وامی (صلی اللہ علیہ وآلہ وسلم) سب سے اچھے چال ڈھال والے تھے ۔ (ابن سعد عن عبداللہ بن بریدہ مرسلا)

17813 ۔۔۔ حضور اکرم (صلی اللہ علیہ وآلہ وسلم) تمام انسانوں میں سب سے زیادہ عمدہ اخلاق کے مالک تھے ۔ (مسلم ، ابو داؤد عن انس (رض))

17814 ۔۔۔ حضور اکرم (صلی اللہ علیہ وآلہ وسلم) سب سے زیادہ حسین ، سب سے زیادہ سخی اور سب سے زیادہ بہادر تھے ۔ (بخاری ، مسلم ، ترمذی ، ابن ماجہ عن انس (رض))

17815 ۔۔۔ حضور اکرم (صلی اللہ علیہ وآلہ وسلم) سب سے زیادہ اچھی صفات والے اور سب سے زیادہ حسن و جمال والے تھے ، مائل بہ درازی میانہ قد والے تھے ۔ دونوں شانوں کے درمیان کشادگی والے اور نرم و خوبصورت رخساروں والے تھے ۔ آپ کے بال مبارک انتہائی سیاہ اور آنکھیں سرمگیں اور دراز پلکوں والی تھیں ۔ جب آپ چلتے تو پورے قدموں کے ساتھ چلتے اور جلدی کی وجہ سے آدھا پاؤں نہ ٹیکتے تھے ، جب شانہ مبارک سے چادر اتارتے تو لگتا گویا چاندی کا مجسمہ کھل گیا ہو ، جب آپ ہنستے تو دندان مبارک چمکتے تھے ۔ (البیھقی فی الدلائل عن ابوہریرہ (رض))

17816 ۔۔۔ حضور اکرم (صلی اللہ علیہ وآلہ وسلم) فداہ ابی وامی ودنیای چمکدار صاف شفاف رنگت کے مالک تھے ، آپ کا پسینہ موتیوں کی مانند چمکتا تھا ، جب آپ چلتے گویا قدرے جھکتے ہوئے نیچے کو اتر رہے ہیں۔ (مسلم عن انس (رض))