Kanz al-Ummal

25827 ۔۔۔ جب راستے میں تمہارا اختلاف ہوجائے تو راستے کو سات ذراع مقرر کرلو ۔ (رواہ احمد بن حنبل ومسلم وابو داؤد والترمذی وابن ماجہ ، عن ابو ہریرہ (رض) واحمد بن حنبل وابن ماجہ والبیہقی فی السنن ، عن ابن عباس (رض))

25828 ۔۔۔ راستے کی حد سات ذراع (ہاتھ) ہے۔ (رواہ الطبرانی فی الاوسط عن جابر)

25829 ۔۔۔ جب صحابہ کرام رضوان اللہ تعالیٰ عنہم اجمعین نے زمین میں راستے پر جھگڑا کیا تو آپ (صلی اللہ علیہ وآلہ وسلم) نے سات ذراع کا فیصلہ کیا ہے۔ (رواہ البخاری ، عن ابو ہریرہ (رض))

25830 ۔۔۔ جب تم راستے میں اختلاف کرو تو اس کی چوڑائی سات ذراع مقرر کرلو ۔ (رواہ احمد بن حنبل والبخاری ومسلم وابو داؤد والترمذی وقال : حسن صحیح ، عن ابو ہریرہ (رض) والبیہقی ، عن ابن عباس (رض))

25831 ۔۔۔ جب تم راستے میں اختلاف کرنے لگو تو سات ذراع راستہ مقرر کرلو اور جو شخص عمارت بنائے وہ ستون دیوار کے ساتھ رکھے ۔ (رواہ احمد بن حنبل والبیہقی ، عن ابن عباس (رض))

25832 ۔۔۔ جب راستے میں تمہارا اختلاف ہوجائے تو راستے کو سات ذراع (ہاتھ) ناپ کر مقرر کرلو اور اس سے کم مت رکھو۔ (رواہ الطبرانی عن ابن عباس (رض))

25833 ۔۔۔ جب راستے میں تمہارا اختلاف ہوجائے تو راستے کو سات ذراع مقرر کرلو پھر عمارت کھڑی کرو ۔ (رواہ عبدالرزاق عن عکرمۃ مرسلا)

25834 ۔۔۔ ابو قلابہ روایت کی ہے کہ نبی کریم (صلی اللہ علیہ وآلہ وسلم) سے آمد ورفت والے راستے کے متعلق دریافت کیا گیا آپ نے فرمایا : ایسا راستہ سات ذراع مقرر کرلو ۔ (رواہ عبدالرزاق )

25835 ۔۔۔ مہمان اپنا رزق ساتھ لے کر آتا ہے ، میزبانوں کے گناہوں کو لے کر کوچ کرتا ہے اور ان کے گناہوں کو مٹا دیتا ہے۔ (رواہ ابو الشیخ عن ابی الدرداء) ۔ کلام : ۔۔۔ حدیث ضعیف ہے دیکھئے التمییز 15 و ضعیف الجامع 3604 ۔

25836 ۔۔۔ جب مہمان کسی قوم کے پاس آتا ہے وہ اپنے رزق کے ساتھ آتا ہے اور جب واپس جاتا ہے تو میزبانوں کی گناہوں کی مغفرت کے ساتھ جاتا ہے ، (رواہ الدیلمی فی مسند الفردوس عن انس (رض)) ۔ کلام : ۔۔۔ حدیث ضعیف ہے دیکھئے اسنی المطالب 117 والتمییز 15 ۔