Kanz al-Ummal

46328 جس شخص نے غیر اللہ کی قسم کھائی اس نے شرک کیا۔۔ رواہ احمد بن حنبل والترمذی والحاکم عن ابن عمر ۔ کلام : حدیث ضعیف ہے دیکھئے المعلۃ 222

46329 ہر وہ قسم جو غیر اللہ کے نام سے اٹھائی جائے وہ شرک ہے۔ رواہ الحاکم عن ابن عمر

46330 اللہ تعالیٰ کے نام کی قسم کھاؤ اور قسم پوری کرو سچائی کا دامن ہاتھ سے مت چھوڑو بلاشبہ اللہ تعالیٰ کو یہ بات محبوب ہے کہ تم اس کے نام کی قسم اٹھاؤ۔ رواہ ابونعیم فی الحلیۃ عن ابن عمر

46331 جو شخص قسم اٹھائے وہ اللہ تعالیٰ کے نام کی قسم اٹھائے۔ رواہ النسائی عن ابن عمر

46332 جس شخص نے قسم کھانی ہو اسے چاہیے کہ وہ رب کعبہ کی قسم کھائے۔۔ رواہ احمد بن حنبل والبیہقی فی السنن عن قتیلہ بنت صیفی

46333 اللہ تعالیٰ تمہیں اس بات سے منع فرماتا ہے کہ تم اپنے باپ ، دادا کی قسم کھاؤ جس شخص کو قسم کھانا ہو تو اسے چاہیے کہ وہ اللہ کی قسم کھائے یا خاموش رہے۔۔ رواہ مالک واحمد بن حنبل والبیہقی وابوداؤد والنسائی عن عمر

46334 یقیناً اللہ تعالیٰ تمہیں اس بات سے منع فرماتا ہے کہ تم اپنے آباء کی قسم کھاؤ۔۔ رواہ احمد بن حنبل والبخاری ومسلم عن عمر

46335 اپنے آباء کی قسم مت کھاؤ۔ رواہ البخاری والنسائی عن عمر

46336 نہ اپنے باپوں کی قسم کھاؤ اور نہ بتوں کی قسم کھاؤ ۔۔ رواہ احمد بن حنبل والنسائی وابن ماجہ عن عبدالرحمن سمرۃ

46337 تم اپنے باپوں، ماؤں اور بتوں کی قسمیں مت کھاؤ۔ اور اللہ کی قسم بھی مت کھاؤ الایہ کہ تم اسے سچ کردکھاؤ۔ رواہ ابوداؤد والنسائی عن ابوہریرہ