Kanz al-Ummal

17685 ۔۔۔ ہر مشترک شے زمین ہو یا باغ (وغیرہ) ہو تو اس میں شفعہ ہے۔ کسی حصہ دار کو جائز نہیں کہ اس کو فروخت کر دے جبکہ دوسرے حصہ دار کو پیش کش نہ کرے ۔ پھر دوسرا لے لے یا چھوڑ دے ۔ لہٰذا اگر وہ (دوسرا کسی کو فروخت کرنے سے) منع کر دے تو وہی اس کو خریدنے کا زیادہ حقدار ہے ، ورنہ وہ (کسی کو بھی فروخت کرنے کی) اجازت دے ۔ (مسلم ، ابو داؤد ، نسائی عن جابر (رض))
تنبہ : ۔۔۔ تفصیلات فقہی کتب میں ملاحظہ فرمائیں ۔

17686 ۔۔۔ شفعہ اونٹ کی رسی کھولنے کی مانند ہے۔ (ابن ماجہ عن ابن عمر (رض))
فائدہ : ۔۔۔ مشترک شی زمین زئیداد وغیرہ کو فروختگی کے وقت پہلے حصہ دار کو پیش کرنا ضروری ہے ، اس سے حصہ دار فروخت کندہ واجب الذمہ عہدہ سے بری الذمہ ہوجاتا ہے۔ زوائد (علی ابن ماجہ) میں اس روایت پر ضعف کا حکم لگایا گیا ہے۔

17687 ۔۔۔ جب زمین تقسیم کرلی جائے اور اس کی (ملکیتی) حدود متعین ہوجائیں تو اس میں شفعہ (خلط) نہیں رہتا (ابو داؤد عن ابوہریرہ (رض))

17688 ۔۔۔ جس کے پاس کوئی (مشترک) زمین یا باغ ہو تو وہ اس کو فروخت نہ کرے تاوقتیکہ اس کو اپنے شریک پر پیش نہ کر دے ۔

17689 ۔۔۔ جس کے باغ میں کوئی حصہ دار ہو تو وہ اپنا حصہ فروخت نہ کرے جب تک کہ اپنے حصہ دار کو پیش نہ کر دے ۔ (مسند احمد ، ترمذی ، مستدرک الحاکم عن جابر (رض))

17690 ۔۔۔ جس کا کوئی حصہ دار ہو اس کے گھر یا باغ میں تو اس کو فروخت کرنا جائز نہیں جب تک کہ اپنے حصہ دار کو اطلاع نہ کر دے ۔ اگر وہ لینے پر رضا مند ہو تو خرید لے ورنہ چھوڑ دے ۔ (مسلم عن جابر (رض))

17691 ۔۔۔ جس کے پاس کوئی باغ یا زمین ہو وہ اس وقت تک اس کو فروخت نہ کرے جب تک اپنے حصہ دار پر اس کو پیش نہ کر دے (ابن ماجہ عن جابر (رض))

17692 ۔۔۔ جس کے پاس زمین ہو اور وہ اس کو فروخت کرنا چاہے تو پہلے اپنے ہمسایہ کو پیش کش کر دے ۔ (ابن عن ابن عباس (رض))

17693 ۔۔۔ شریک کا شریک پر شفعہ نہیں رہتا جب وہ خریدنے میں پہل کر جائے اور نہ بچے اور غائب کا شفعہ میں کوئی حق ہے۔ (ابن ماجہ عن ابن عمر (رض))
کلام : ۔۔۔ ابن ماجہ نے کتاب الشفعہ میں 2501 رقم الحدیث پر اس کی تخریج فرمائی اور یہ روایت ضعیف ہے۔

17694 ۔۔۔ شفعہ (خلیط) ان جائیداد وغیرہ میں ہوتا ہے جس کی حدود متعین نہ ہوں ۔ لیکن جب (ہر حصہ دار کی) حدود متعین ہوجائیں تو کوئی شفعہ نہیں رہتا ۔ (طبرانی فی الکبیر عن ابن عمر (رض))