Kanz al-Ummal

9194 ۔۔۔ فرمایا حلال کمائی سب سے افضل کاموں میں سے ہے۔ (ابن ال عن ابی سعید (رض)) ۔

9195 ۔۔۔ فرمایا سب سے افضل کمائی وہ خریدو فروخت ہے جو جھوٹ اور خیانت سے خالی ہو اور اپنے ہاتھ سے کام کرنا بھی افضل ہے۔ (مسند احمد، طبرانی، بروایت حضرت ابوبردۃ (رض) بن نیار (رض)) ۔
فائدہ :۔۔۔ یعنی بجائے لوگوں کا محتاج بننے سے خود محنت سے حلال مال کمانا افضل ہے۔ (مترجم)

9196 ۔۔۔ فرمایا ” سب سے پاک کمائی وہ ہے جو انسان نے خود محنت کر کے حاصل کی ہو اور ہر وہ خریدو فروخت جو جھوٹ اور خیانت سے خالی ہو “۔ (مسند احمد، طبرانی، حاکم بروایت حضرت رافع بن خدیج (رض) اور طبرانی بروایت حضرت ابن عمر (رض) عنھما) ۔

9197 ۔۔۔ فرمایا ” آخری زمانے میں میری امت میں حلال درھم اور بااعتماد بھائی کم ہوں گے “۔ ( کامل ابن عدی اور ابن عساکر بروایت حضرت عمر (رض)، الضعیفہ 121) ۔
فائدہ :۔۔۔ یعنی امت مسلمہ پر ایک ایسا وقت بھی آئے گا کہ جب حلال مال کم ہوگا اور بااعتماد لوگ بھی کم ہوں گے یعنی حرام کے ساتھ ساتھ جھوٹ اور دھوکے بازی بھی زیادہ ہوجائے گی۔ مترجم

9198 ۔۔۔ فرمایا ” تمام انبیاء رسولوں کو حکم دیا گیا کہ صرف پاک مال ہی کھائیں اور صرف نیک عمل ہی کریں۔ (مستدرک حاکم بروایت ام عبداللہ بن اخت شداد بن اوس (رض)) ۔

9199 ۔۔۔ فرمایا ” اللہ تعالیٰ نے اپنے اس مومن بندے سے محبت رکھتے ہیں جس نے کوئی (حلال) پیشہ اختیار کر رکھا ہو۔ ( حاکم، طبرانی، بیھقی شعب الایمان بروایت حضرت ابن عمر (رض)، ضعیف الاسرار المرفوعۃ، 90، الاتفاق 285 التذکرۃ 134) ۔

9200 ۔۔۔ فرمایا ” کہ اللہ تعالیٰ کو یہ بات پسند ہے کہ وہ اپنے بندے کو حلال کی تلاش و طلب میں تھکا ہوا دیکھیں۔ (مسند فردوس دیلمی بروایت حضرت علی (رض)) ۔

9201 ۔۔۔ فرمایا ” حضرت موسیٰ (علیہ السلام) نے پاکدامنی اور حلال رزق کے لیے آٹھ یادس سال مزدوری کی۔ (ابن ماجہ بروایت عتبۃ بن بدر (رض) )
فائدہ :۔۔۔ یعنی جب حضرت موسیٰ (علیہ السلام) مصر سے مدین پہنچے تو حضرت شعیب (علیہ السلام) نے اپنی صاحبزادی نے مذکورہ شرائط پر آپ (صلی اللہ علیہ وآلہ وسلم) کا نکاح کردیا تھا جیسا کہ قرآن کریم میں مذکور ہے۔ (مترجم)

9202 ۔۔۔ فرمایا “ کوئی بھی شخص جس نے حلال مال کمایا، خود کھایا اور پہنا اور اپنے علاوہ اور لوگوں کو بھی کھلایا اور پہنایا تو یہ اس کے لیے زکوۃ (صدقہ) ہوگا، اور اگر کوئی مسلمان شخص ایسا ہو جس کے پاس صدقہ کے لیے کچھ نہ ہو تو اسے اپنے دل میں مندرجہ ذیل کلمات بھی کہنے چاہئیں جو اس کے لیے صدقہ ہوں گے۔
اللھم صلی علی محمد عبدک ورسولک وصلی علی المومنین والمومنات والمسلمین والمسلمات
ترجمہ :۔۔۔ اے اللہ ! آپ رحمت نازل فرمائیے اپنے بندے اور رسول محمد (صلی اللہ علیہ وآلہ وسلم) پر اور تمام مومنین اور مومنات اور تمام مسلمین اور مسلمات پر۔
(مسند ابن یعلی صحیح ابن حبان اور مستدرک حاکم بروایت حضرت ابو سعید خدری (رض) ، ذکر فی ذخیرۃ الحفاظ 2261

9203 ۔۔۔ فرمایا ” کہ رزق حلال کو طلب کرنا فرائض کے بعد اہم فرض ہے “۔ (طبرانی، بروایت حضرت ابن مسعود (رض)، ضعیف تذکرۃ الموضوعات 133، الجامع المصنف 368 التوائد المجموعۃ 419)
فائدہ :۔ یعنی مال ہو رزق ہو یا پیشہ خواہ کچھ بھی ہو حلال ہو اس کی طلب اسلام کے بنیادی فرائض کے بعد اھم ترین فریضہ ہے۔ (مترجم)