Kanz al-Ummal

٥١٢٨۔۔۔ اچھے اخلاق جنت کے اعمال ہیں۔ (طبرانی الاوسط عن انس (رض))

٥١٢٩۔۔۔ اچھے اخلاق دس ہیں جو (بعض دفعہ) مرد میں تو ہوتے ہیں (لیکن) اس کا بیٹا ان سے عاری ہوتا ہے اور (بسا اوقات) بیٹے میں ہوتے ہیں جبکہ باپ ان سے محروم ہوتا ہے (کبھی) غلام میں ہوتے ہیں (لیکن) اس کے مالک میں نہیں ہوتے، اللہ تعالیٰ ان اخلاق کو اس کے لیے تقسیم فرماتے ہیں جس کو نیک بخت وسعادت مند بنانا چاہیں۔
١۔۔۔ گفتگو کی سچائی۔ ٢۔۔۔ سچی تنگدستی۔ ٣۔۔۔ مانگنے والے کو دینا۔
٤۔۔۔ نیکی کرکے بدلہ اتارنا۔ ٥۔۔۔ امانت کی حفاظت۔ ٦۔۔۔ رشتہ داری کو قائم رکھنا۔
٧، ٨۔۔۔ پڑوستی اور دوست کے لیے عار محسوس کرنا۔ ٩۔ مہمان نوازی کرنا اور ان سب کی بنیاد۔
١٠۔۔۔ شرم و حیاء ہے۔ (حکیم بیہقی فی شعب الایمان عن عائشہ (رض))

٥١٣٠۔۔۔ جس مومن کے اخلاق اچھے ہیں وہ کامل ایمان والا ہے۔ (مسند احمد ، ابن حبان، ابو داؤد، مستدرک الحاکم عن ابوہریرہ (رض))

٥١٣١۔۔۔ جس کے اخلاق اچھے ہوں وہ کامل ترین ایمان والا ہے اور تم میں سے بہترین شخص وہ ہے جو اپنی عورتوں کے حق میں بہترین ہو۔
تشریح :۔۔۔ بظاہر یہاں ایک لفظ چھوٹ گیا ہے ” وخبارھم خیار النسائھم “ زیادہ مناسب ہے۔

٥١٣٢۔۔۔ اچھے اخلاق گناہوں کو یوں پگھلا دیتے ہیں جیسے پانی برف کو پگھلا دیتا ہے، اور برے اخلاق اعمال کو ایسے خراب کرتے ہیں جیسے سرکہ شہد کو خراب کردیتا ہے۔ (طبرانی الکبیر عن ابن عباس (رض))

٥١٣٣۔۔۔ اچھے اخلاق گناہوں کو یوں پگھلا دیتے ہیں جیسے دھوپ برف کو پگھلا دیتی ہے۔ (الکامل لابن عدی عن ابن عباس (رض))

٥١٣٤۔۔۔ بیشک اچھے اخلاق برائیوں کو یوں پگھلا دیتے ہیں جیسے دھوپ برف کو پگھلا دیتی ہے۔ (الخرانطی فی مکارم الاخلاق عن ابن عباس عن انس )

٥١٣٥۔۔۔ اچھے اخلاق اللہ تعالیٰ کی رحمت کی لگام ہیں۔ (ابو الشیخ فی الثواب عن ابی موسیٰ)

٥١٣٦۔۔۔ اچھے اخلاق صرف حیض اور زناء کی پیدائش والے سے چھینے جاتے ہیں۔ (فردوس عن ابوہریرہ (رض))
تشریح : ۔۔۔ ضروری نہیں کہ ہر بداخلاق حیض و زناء کی پیدائش ہو، بلکہ یہ مذمت و حقارت کے درجہ میں ہے جیسے دوسری احادیث میں آیا ہے کہ منافق ہی جھوٹ بولتا ، وعدہ خلافی کرتا اور امانت میں خیانت سے کام لیتا ہے۔

٥١٣٧۔۔۔ اخلاق دین کا برتن ہیں۔ (الحکیم عن انس)
تشریح :۔۔۔ جتنے اچھے اخلاق ہوں گے اتنی زیادہ دینداری ہوگی، صرف نماز، روزہ ، اور ظاہری اعمال دین نہیں بلکہ دین کے اجزاء ہیں۔