Kanz al-Ummal

29567 ۔۔۔ جس شخص نے غلام آزاد کیا اللہ تعالیٰ آزاد کردہ غلام کے ہر عضو کے بدلہ میں آزاد کنندہ کے ہر ہر عضو کو دوزخ سے آزاد کریں گے حتی کہ آزاد کردہ غلام کی شرمگاہ کے بدلہ میں آزاد کنندہ کی شرمگاہ کو آزاد کریں گے ۔ (رواہ البخاری ومسلم والترمذی عن ابو ہریرہ (رض))

29568 ۔۔۔ جو شخص مشترک غلام کے اپنے حصہ کو آزاد کرے گا تو اس پر ضروری ہے کہ وہ اپنے مال کے بدلہ میں اس پورے غلام کو آزاد کرے اگر اس کے پاس مال ہو تو انصاف کے ساتھ اس کی قیمت لگائی جائے گی اور غلام ان باقی حصوں کے بعد مزدوری کرے لیکن غلام کو مشقت میں مبتلا نہ کیا جائے ۔ (رواہ احمد بن حنبل والبخاری ومسلم واصحاب السنن الاربعۃ عن ابو ہریرہ (رض))

29569 ۔۔۔ جو شخص کسی مشترک غلام کے اپنے حصہ کو آزاد کر دے ۔ (تو اس کے لیے پھر یہ ہے کہ) اگر اس کے پاس اتنا مال موجود ہو جو غلام (کے باقی حصوں) کی قیمت کے بقدر ہو تو انصاف کے ساتھ اس غلام کی قیمت لگائی جائے گی اور وہ اس غلام کے دوسرے شرکاء کو ان کے حصوں کے بقدر قیمت دے دے وہ غلام اس کی طرف سے آزاد ہوجائے گا اور اگر آزاد کنندہ کے پاس اتنا مال نہ ہو تو پھر اس غلام کا جو حصہ اس نے آزاد کیا ہے وہ آزاد ہوجائے گا (اور دوسرے شرکاء کے حصے مملوک رہیں گے) ۔ (رواہ احمد بن حنبل والبخاری ومسلم واصحاب السنن الاربعۃ عن ابن عمر)

29570 ۔۔۔ جس شخص نے غلام آزاد کیا جبکہ غلام کے پاس کچھ مال ہو تو غلام کا مال مالک کا مال سمجھا جائے گا الا یہ کہ مالک شرط لگا دے کہ غلام کا مال اسی کا مال ہے تو اس صورت میں غلام کا مال اسی کا مال ہوگا۔ (رواہ ابو داؤد وابن ماجہ عن ابن عمرو (رض)) ۔ کلام : ۔۔۔ حدیث ضعیف ہے دیکھئے المعلۃ 220 ۔

29571 ۔۔۔ وہ غلام پورے کا پورا آزاد ہے اور اللہ تعالیٰ کا کوئی شریک نہیں ۔ (رواہ احمد بن حنبل والنسائی وابو داؤد وابن ماجہ عن والدابی الملیح)

29572 ۔۔۔ جس شخص نے کسی مومن غلام کو آزاد کیا یہ غلام آزاد کرنے والے کے لیے دوزخ سے فدیہ بن جائے گا ۔ (رواہ احمد بن حنبل والترمذی عن ابن عمرو (رض) بن عسسہ)

29573 ۔۔۔ آزاد کرنے میں سب سے اعلیٰ غلام وہ ہے جس کی قیمت سب سے بڑھیا ہو رات کا سب سے افضل حصہ نصف رات ہے اور سب سے افضل مہینہ محرم ہے۔ (رواہ ابن النجار عن ابی ذر) ۔ کلام : ۔۔۔ حدیث ضعیف ہے دیکھئے ضعیف الجامع 794 ۔

29574 ۔۔۔ آزاد کرنے میں سب سے افضل غلام وہ ہے جو قیمت میں سب سے اعلی ہو اور مالکان کے ہاں ہر دل عزیز ہو۔ (رواہ احمد بن حنبل والبخاری ومسلم والنسائی عن ابی ذر واحمد بن حنبل والطبرانی عن ابی امامہ)

29575 ۔۔۔ اپنے صاحب کی طرف سے غلام آزاد کر دو اللہ تعالیٰ آزاد کردہ غلام کے ہر عضو کے بدلہ میں تمہارے صاحب کے ہر ہر عضو کو دوزخ سے آزاد کرے گا ۔ (رواہ ابو داؤد والحاکم عن واثلۃ) ۔ کلام : ۔۔۔ حدیث صحیح ہے اگرچہ ضعیف الجامع میں اس پر بحث ہے دیکھئے 929 ۔

29576 ۔۔۔ جس مسلمان نے بھی کسی مسلمان غلام کو آزاد کیا اللہ تعالیٰ آزاد کردہ غلام کی ہر ہڈی کو آزاد کنندہ کی ہر ہڈی کے لیے دوزخ سے حفاظت کا ذریعہ بنائے گا اور جس عورت نے بھی کسی مسلمان باندی کو آزاد کیا اللہ تعالیٰ آزاد کردہ باندی کی ہر ہڈی کو آزاد کنندہ عورت کی ہر ہڈی کے لیے قیامت کے دن دوزخ سے حفاظت کا ذریعہ بنائے گا ۔ (رواہ ابو داؤد وابن حبان عن ابی نجیع السلمی)