Kanz al-Ummal

29826 ۔۔۔ اللہ تبارک وتعالیٰ کسی کے آگے زیر نہیں ہوتا اور نہ دھوکا کھاتا ہے جو کچھ وہ نہیں جانتا اس کے متعلق اسے آگاہ نہیں کیا جاتا ۔ (رواہ الطبرانی عن معاویہ) ۔ کلام : ۔۔۔ حدیث ضعیف ہے دیکھئے ضعیف الجامع 1677 ۔

29827 ۔۔۔ تیرا اس ہو ! اللہ تعالیٰ سے اس کی مخلوق میں سے کسی کے خلاف مدد نہیں طلب کی جاتی چونکہ اللہ تعالیٰ اس سے عظیم تر ہے تیرا ناس ہو کیا تم اللہ تبارک وتعالیٰ کی عظمت وشان کو جانتے ہو ؟ اللہ تعالیٰ اپنے عرش پر براجمان ہے اس کا عرش آسمانوں پر ہے جبکہ اس کی زمین قبے کی مانند ہے عرش چرچراتا ہے جس طرح سوار سے کجاوہ چرچرانے لگتا ہے۔ (رواہ ابو داؤد عن جبیر بن مطعم) ۔ کلام : ۔۔۔ حدیث ضعیف ہے دیکھئے ضعیف الجامع 6137 ۔

29828 ۔۔۔ کلام پاک اللہ تبارک وتعالیٰ کا خزانہ ہے جب اللہ تبارک وتعالیٰ کسی چیز کو وجود دینا چاہتا ہے تو کن کہتا ہے وہ چیز وجود میں آجاتی ہے ۔۔ (رواہ ابو الشیخ فی العظمۃ عن ابوہریرہ (رض)) ۔ کلام : ۔۔۔ حدیث ضعیف ہے دیکھئے ضعیف الجامع 2825 ۔

29829 ۔۔۔ میں وہ کچھ دیکھتا ہوں جو تم نہیں دیکھتے اور میں وہ کچھ سنتا ہوں جو تم نہیں سنتے آسمان میں چرچراہٹ ہے اور چرچرانا آسمان کا حق ہے چونکہ آسمان میں چار انگلیوں کے بقدر بھی جگہ نہیں جہاں فرشتے نے سر سجدے میں نہ رکھا ہو بخدا ! جو کچھ میں جانتا ہوں وہ اگر تم بھی جانتے ہنستے کم روتے زیادہ اور بچھونوں پر لیٹ کر اپنی بیویوں سے لذت نہ اٹھاسکتے تم پہاڑوں پر نکل جاتے اور اللہ تعالیٰ کے حضور آہ وبکا شروع کردیتے ۔ (رواہ احمد بن حنبل والترمذی وابن ماجہ والحاکم عن ابی ذر) ۔ کلام : ۔۔۔ حدیث ضعیف ہے دیکھئے ضعیف ابن ماجہ 917 و ضعیف الترمذی 401 ۔

29830 ۔۔۔ آسمان چر چرا رہا ہے اور چرچرانا اس کا حق بھی ہے قسم اس ذات کی جس کے قبضہ قدرت میں محمد (صلی اللہ علیہ وآلہ وسلم) کی جان ہے آسمان میں بالشت برابر بھی جگہ نہیں جس میں کوئی فرشتہ سر بسجود نہ ہو اور اللہ تبارک وتعالیٰ کی حمد و تسبیح میں مشغول نہ ہو ۔ (رواہ ابن مردویہ عن انس)

29831 ۔۔۔ جو کچھ میں سنتا ہوں کیا وہ تم بھی سنتے ہو ، میں آسمان کی چرچراہٹ سن رہا ہوں اور آسمان کے چرچرانے کو ملامت نہیں چونکہ آسمان پر بالشت برابر بھی جگہ نہیں الا یہ کہ ہر جگہ کوئی فرشتہ سر بسجود ہے یا حالت قیام میں ہے۔ (رواہ الطبرانی والضیاء عن حکیم بن حرام)

29832 ۔۔۔ اللہ تبارک وتعالیٰ کا ایک فرشتہ ایسا ہے کہ اگر اسے کہا جائے کہ ساتوں آسمانوں اور زمین کو ایک لقمہ بنا لے یقیناً وہ ایسا کرے گا ” سبحانک حیث کنت “ اس کی تسبیح ہے۔ (رواہ الطبرانی عن ابن عباس (رض))

29833 ۔۔۔ اللہ تبارک وتعالیٰ بزرگی والا ہے جو دلوں کو پھیر دیتا ہے۔ (رواہ الطبرانی عن ام سلمۃ (رض))

29834 ۔۔۔ بیٹھو تاکہ میں تمہیں رب تعالیٰ کی عظمت سے آگاہ کروں اللہ تعالیٰ ابو جحش کی نماز سے بےنیاز ہے آسمان دنیا پر اللہ تبارک وتعالیٰ کے کچھ فرشتے ہیں جو رب تعالیٰ کے حضور سر تسلیم خم کیے ہوئے ہیں اور تا قیامت اپنے سر اوپر نہیں اٹھانے پائیں گے جب قیامت قائم ہوجائے گی یہ فرشتے سر اوپر اٹھائیں گے اور کہیں گے اے ہمارے رب ! جس طرح تیری عبادت کا حق ہے ہم نے وہ حق ادا نہیں کیا دوسرے آسمان پر بھی اللہ تعالیٰ کے کچھ فرشتے ہیں جو سر بسجود ہیں اور تا قیامت اپنے سر اوپر نہیں اٹھانے پائیں گے جب قیامت قائم ہوجائے گی یہ فرشتے سر اوپر اٹھائیں گے اور کہیں گے اے ہمارے رب ! جس طرح تیری عبادت کا حق ہے ہم نے وہ حق ادا نہیں ہوا تیسرے آسمان پر بھی اللہ تبارک وتعالیٰ کے فرشتے ہیں جو مسلسل رکوع میں جھکے ہوئے ہیں اور تا قیامت اپنے سر اوپر نہیں اٹھانے پائیں گے جب قیامت قائم ہوجائے گی یہ فرشتے سر اوپر اٹھائیں گے اور کہیں گے اے ہمارے رب ! جس طرح تیری عبادت کا حق ہے ہم نے وہ حق ادا نہیں ہوا ۔ سیدنا حضرت عمر بن خطاب (رض) نے عرض کیا : یا رسول اللہ ! یہ فرشتے کیا کیا کہتے ہیں ؟ آپ (صلی اللہ علیہ وآلہ وسلم) نے فرمایا : آسمان دنیا کے فرشتے کہتے ہیں : ” سبحان ذی الملک والملکوت “۔ دوسرے آسمان کے فرشتے کہتے ہیں : ” سبحان ذی العزۃ والجبروت “۔ تیسرے آسمان کے فرشتے کہتے ہیں : ” سبحان الحی الذی لا یموت “۔ (رواہ ابو الشمیع فی العظمۃ والحاکم والبیہقی عن ابن عمرو (رض) وقال الذھبی منکر غریب)

29835 ۔۔۔ اے عمر ! واپس آؤ تمہارا غصہ عزت ہے تمہاری خوشی حکم ہے چنانچہ اللہ تبارک وتعالیٰ کے بیشمار فرشتے ہیں جو آسمانوں میں محو عبادت ہیں اللہ تبارک وتعالیٰ فلاں کی نماز سے بےنیاز ہیں سیدنا حضرت عمر بن خطاب (رض) نے عرض کیا : ان فرشتوں کی نماز کیا ہے ؟ نبی کریم (صلی اللہ علیہ وآلہ وسلم) نے کوئی جواب نہ دیا حتی کہ جبرائیل امین (علیہ السلام) تشریف لائے اور کہا اے اللہ کے نبی ! عمر نے آپ سے اہل آسمان کی نماز کے متعلق سوال کیا ہے ؟ فرمایا : جی ہاں جبرائیل امین (علیہ السلام) نے کہا ہے کہ عمر کو سلام کہیں اور انھیں خبر دیں کہ آسمان دنیا کے فرشتے تاقیامت سجدے میں ہیں اور وہ یہ تسبیح کہتے ہیں : ” سبحان ذی الملک والملکوت “ تیسرے آسمان کے فرشتے تاقیامت حالت قیام میں ہیں اور وہ یہ تسبیح کہتے ہیں ” سبحان الحی الذی لایموت “۔ (رواہ ابن جریر وابو نعیم فی الحلیۃ عن سعید بن جبیر مرسلا)