Kanz al-Ummal

٩١٧٣۔۔۔ حضرت عمر (رض) سے روایت ہے فرمایا : جو شخص بھی کرائے پر کوئی (جانور) دے پھر اس کا مالک ذولحلیفہ سے آگے گزر گیا تو اس کا کرایہ واجب ہے جبکہ اس پر ضمان نہیں۔ (بیھقی فی الشعب)

٩١٧٤۔۔۔ بکیربن عبداللہ بن الاشج سے روایت ہے کہ حضرت عمر (رض) نے ان کاریگروں کو جنہوں نے اپنے آپ کو اپنے کاموں کیلئے مقرر کیا ہے جو چیز ان کے ہاتھوں میں ضائع ہوجائے اس کا ضامن بنایا۔ (عبدالرزاق ، مصنف ابن ابی شیبہ)

٩١٧٥۔۔۔ حضرت ابوہریرہ (رض) سے روایت ہے فرمایا : اگر مال والا اس سے یہ شرط طے کرے کہ وہ بطن وادی میں نہیں اترے گا پھر وہ وہاں اترا اور ہلاک ہوگیا تو وہ ضامن ہے۔ (عبدالرزاق)

٩١٧٦۔۔۔ حضرت رافع بن خدیج (رض) سے روایت ہے فرمایا : نبی (صلی اللہ علیہ وآلہ وسلم) ایک دیوار کے پاس سے گزرے وہ آپ کو اچھی لگی، فرمایا : یہ کسی کی ہے ؟ میں نے عرض کیا : میری ہے آپ نے فرمایا : تم نے یہ کیسے حاصل کی ؟ میں نے کہا : میں نے کہا : میں نے اسے اجرت پر دیا ہے آپ نے فرمایا : کسی چیز کے بدلہ اسے اجرت پر نہ دو ۔ (طبرانی فی الکبیر)

٩١٧٧۔۔۔ محمد بن اسحاق ، یزیدبن ابی حبیب وہ حضرت عوف بن مالک اشجعی (رض) سے روایت کرتے ہیں : فرماتے ہیں :
میں اس غزوہ میں تھا جس میں رسول اللہ (صلی اللہ علیہ وآلہ وسلم) نے (حضرت) عمر وبن العاص کو ذات السلاسل کی طرف روانہ فرمایا تھا، فرماتے ہیں ابوبکر اور عمر کے ساتھ تھا، میں کچھ لوگوں کے پاس سے گزرا جن کے ذبح شدہ چند اونٹ تھے جنہیں انھوں جمع کررکھا تھا (لیکن) وہ انھیں کاٹ نہ سک رہے تھے، جبکہ میں ماہر اور اونٹوں والا شخص تھا، میں نے کہا : کیا تم مجھے ان میں دس حصے دوگے اگر میں انھیں تمہارے درمیان تقسیم کردوں ، انھوں نے کہا : ٹھیک ہے، میں نے دوچھریاں لیں، میں نے اپنی جگہ ان کے ٹکڑے کیے اور ایک ٹکڑا اپنے دوستوں کے پاس لے گیا، اور اسے پکا کر کھایا، مجھے ابوبکر (رض) اور عمر نے کہا : عوف تم نے یہ گوشت کہاں سے حاصل کیا ہے ؟ تو میں نے اس کا سارا واقعہ انھیں بتایا۔
ان حضرات نے فرمایا : اللہ تعالیٰ کی قسم تم نے ہمیں یہ گوشت کھلا کر اچھا نہ کیا، پھر دونوں اٹھے اور جو کچھ ان کے پیٹ
میں تھا اس کے قے کرنے لگے، بعد میں جب لوگ اس سفر سے واپس ہوئے تو میں سب سے پہلے رسول اللہ (صلی اللہ علیہ وآلہ وسلم)
کے پاس گیا، میں جب آیا تو آپ اپنے گھر میں نماز پڑھ رہے تھے، میں نے عرض کیا : یارسول اللہ السلام علیک و رحمۃ اللہ وبرکاتہ، آپ نے فرمایا : کیا عوف بن مالک ہو ؟ میں نے کہا : جی ہاں میرے مان باپ آپ پر قربان ہوں، آپ نے فرمایا : کیا اونٹوں والے ہو ؟ اس سے زیادہ رسول اللہ (صلی اللہ علیہ وآلہ وسلم) نے مجھے کچھ نہ کہا، علامہ ابن کیثر فرماتے ہیں : یہ منقطع روایت ہے کیونکہ یزید بن ابی حبیب نے حضرت عوف کو نہیں دیکھا۔

٩١٧٨۔۔۔ وضین بن عطاء سے روایت ہے کہ مدینہ میں تین شخص تھے جو بچوں کو کام پر لگاتے تھے، حضرت عمران میں سے ہر ایک کو ہر ماہ پندرہ درھم دیا کرتے تھے۔ (مصنف ابن ابی شیبہ ، بیھقی فی السنن)

٩١٧٩۔۔۔ (علی (رض)) جعفر بن محمد، اپنے والد سے روایت کرتے ہیں : فرمایا : کہ حضرت علی (رض) لوگوں کی حفاظت کے لیے، درزیوں رنگریزوں اور ان جیسے لوگوں کو ضامن قرار دیتے تھے اور فرماتے : لوگوں کے لیے اس کے علاوہ اصلاح کی کوئی صورت نہیں۔ (عبدالرزاق، بیھقی فی السنن)

٩١٨٠۔۔۔ حضرت عمر (رض) سے روایت ہے فرمایا : غلام کا ایلادوماہ ہے۔ (عبدالرزاق)

٩١٨١۔۔۔ حضرت عمر (رض) سے روایت ہے فرمایا : ایلاء کرنے والے کو اگر چار ماہ ہوجائیں تو یہ ایک طلاق ہے وہ عورت کو اس کی عدت کے دوران واپس لوٹانے کی قدرت رکھتا ہے۔ (دارقطنی، بیھقی فی السنن)

٩١٨٢۔۔۔ حضرت عمر (رض) سے روایت ہے فرمایا : ایلاء کرنے والے کو جب چار ماہ ہوجائیں تو جب تک وہ وقوف کرے اس پر کچھ واجب نہیں ، پھر یا طلاق دے یا عورت کو روکے رکھے۔ (ابن جریر)