(١١٤٢٠) حضرت ابن عباس (رض) سے روایت ہے کہ نبی کریم (صلی اللہ علیہ وآلہ وسلم) چوتھی ذی الحجہ کی صبح کو حج کا تلبیہ کہتے ہوئے اور اس کے ساتھ کوئی اور چیز نہ ملاتے ہوئے داخل ہوئے۔ جب ہم مکہ پہنچے تو آپ (صلی اللہ علیہ وآلہ وسلم) کے حکم سے ہم نے اپنے حج کو عمرہ کر ڈالا اور ہماری بیویاں بھی ہمارے لیے حلال ہوگئیں۔ اس پر لوگوں میں باتیں ہونے لگیں۔
عطاء فرماتے ہیں : جابر (رض) نے فرمایا کہ کچھ لوگ کہنے لگے : کیا ہم میں سے کوئی منیٰ اس طرح جائے گا کہ اس کی منی اس کے ذکر سے ٹپک رہی ہو۔ یہ بات نبی (صلی اللہ علیہ وآلہ وسلم) تک پہنچی تو آپ خطبہ دینے کے لیے کھڑے ہوئے اور فرمایا : مجھے معلوم ہوا ہے کہ بعض لوگ اس طرح کی باتیں کر رہے ہیں، اللہ کی قسم ! میں ان سے زیادہ اللہ سے ڈرنے ولا ہوں، اگر مجھے وہ بات پہلے ہی معلوم ہوتی جواب معلوم ہوئی ہے تو میں قربانی کے جانور اپنے ساتھ نہ لاتا اور اگر میرے ساتھ قربانی کے جانور نہ ہوتے تو میں بھی احرام کھول دیتا۔ اس پر سراقہ بن جعشم کھڑے ہوئے اور کہا : یا رسول اللہ ! کیا یہ حکم خاص ہمارے لیے ہے یا ہمیشہ کے لیے ؟ آپ نے فرمایا : نہیں بلکہ ہمیشہ کے لیے۔ راوی کہتے ہیں : علی بن ابی طالب آئے۔ طاؤس اور عطار میں سے ایک کہتا ہے کہ انھوں نے لَبَّیْکَ بِمَا أَہْلَّ بِہِ رَسُولُ اللَّہِ (صلی اللہ علیہ وآلہ وسلم) کہا اور دوسرا کہتا ہے : انھوں نے کہا : لَبَّیْکَ بِحَجَّۃِ رَسُولِ اللَّہِ (صلی اللہ علیہ وآلہ وسلم) نبی (صلی اللہ علیہ وآلہ وسلم) نے انھیں حکم دیا کہ وہ اپنے احرام پر قائم رہیں اور انھیں اپنی قربانی میں شریک کرلیا۔

(١١٤٢١) حضرت جابر سے روایت ہے کہ ہم نے حدیبیہ کے دن ٧٠ اونٹ ذبح کیے، ایک اونٹ سات کی طرف سے۔ نبی (صلی اللہ علیہ وآلہ وسلم) نے فرمایا : قربانی میں شریک ہوجاؤ۔

(١١٤٢٢) سائب بن ابی سائب فرماتے ہیں کہ وہ تجارت میں شروع میں نبی (صلی اللہ علیہ وآلہ وسلم) کے شریک تھے ، جب فتح مکہ کا دن تھا تو آپ نے فرمایا : اے میرے بھائی ! مرحبا اور میرے شریک ! نہ تم لڑتے تھے اور نہ جھگڑتے تھے۔

(١١٤٢٣) حضرت سائب فرماتے ہیں کہ میں رسول اللہ (صلی اللہ علیہ وآلہ وسلم) کے پاس آیا، لوگ میری تعریف اور میرا تذکرہ کر رہے تھے۔ رسول اللہ (صلی اللہ علیہ وآلہ وسلم) نے فرمایا : میں اس کو تم سے زیادہ جانتا ہوں۔ میں نے کہا : میرے ماں باپ آپ پر قربان ہوں، آپ نے سچ کہا، آپ (صلی اللہ علیہ وآلہ وسلم) میرے شریک تھے، کتنے ہی اچھے شریک۔ نہ آپ (صلی اللہ علیہ وآلہ وسلم) لڑتے تھے اور نہ جھگڑتے تھے۔

(١١٤٢٤) حضرت ابوہریرہ (رض) سے روایت ہے کہ رسول اللہ (صلی اللہ علیہ وآلہ وسلم) نے فرمایا : اللہ تعالیٰ فرماتے ہیں : دو شریکوں کے درمیان تیسرا میں ہوتا ہوں، جب تک دونوں ایک دوسرے سے خیانت نہ کریں، جب کوئی خیانت کرتا ہے تو میں درمیان سے نکل جاتا ہوں۔

(١١٤٢٥) پچھلی حدیث کی طرح۔

(١١٤٢٦) (الف ) عبداللہ بن ہشام (رض) سے روایت ہے کہ ان کی ماں زینب بنت حمیدا نہیں رسول اللہ (صلی اللہ علیہ وآلہ وسلم) کے پاس لے گئیں اور کہا : یا رسول اللہ (صلی اللہ علیہ وآلہ وسلم) ! اس سے بیعت لیں، نبی (صلی اللہ علیہ وآلہ وسلم) نے فرمایا : وہ چھوٹا ہے اور اس کے سر پر ہاتھ پھیرا اور اس کے لیے دعا کی اور آپ (صلی اللہ علیہ وآلہ وسلم) ایک بکری سارے گھر والوں کی طرف سے کرتے تھے۔
(ب) زہرہ بن معبد سے روایت ہے کہ وہ اپنے دادا عبداللہ بن ہشام کے ساتھ بازار کی طرف جاتے، غلہ وغیرہ خریدتے۔ وہ ابن عمر (رض) اور ابن زبیر (رض) سے ملے تو وہ دونوں کہنے لگے : ہمیں بھی شریک کرلو۔ نبی (صلی اللہ علیہ وآلہ وسلم) نے آپ کے لیے برکت کی دعا کی ہے، چنانچہ عبداللہ نے انھیں بھی شریک کرلیا اور وہ بسا اوقات کسی قافلے کے پاس جاتے اور اسی طرح اسے گھرلے آتے۔

(١١٤٢٧) پچھلی حدیث کی طرح۔

(١١٤٢٨) حضرت عبداللہ (رض) فرماتے ہیں : میں، عمار بن یاسر اور سعد اس حصہ میں شریک تھے جو ہمیں بدر کے دن ملا تھا۔ میں اور عمار کچھ نہ لائے تھے، جبکہ سعد دو آدمیوں کو لائے تھے۔

(١١٤٢٩) حضرت ابوہریرہ (رض) سے روایت ہے کہ رسول اللہ (صلی اللہ علیہ وآلہ وسلم) نے فرمایا : مسلمان اپنی شرطوں پر قائم رہتے ہیں۔

(١١٤٣٠) کثیر بن عبداللہ مزنی اپنے والد سے اور وہ اپنے داد اسے نقل فرماتے ہیں کہ رسول اللہ (صلی اللہ علیہ وآلہ وسلم) نے فرمایا : مسلمان شرطوں کی پاسداری کرتے ہیں مگر ایسی شرط جو حلال کو حرام کر دے۔

(١١٤٣١) پچھلی حدیث کی طرح ہے۔