Sunan Al Bayhaqi

(١٤٣٣٢) حضرت عقبہ بن عامر (رض) فرماتے ہیں کہ نبی (صلی اللہ علیہ وآلہ وسلم) نے ایک شخص کو فرمایا : فلاں عورت سے آپ کی شادی کر دوں، آپ راضی ہیں ؟ میں نے کہا : ہاں اور عورت سے پوچھا : فلاں مرد سے آپ کی شادی کر دوں، آپ راضی ہیں ؟ اس نے بھی کہہ دیا : ہاں تو ان کی شادی بغیر حق مہر اور بغیر کچھ دیے انجام پائی اور وہ شخص حدیبیہ میں حاضر ہوا تھا اور ان لوگوں کے لیے خیبر میں حصہ رکھا گیا تھا۔ جب اس کی موت کا وقت آیا تو اس نے کہا کہ فلاں عورت سے رسول اللہ (صلی اللہ علیہ وآلہ وسلم) نے میری شادی بغیر حق مہر اور بغیر کچھ دیے کردی تھی اور میں تمہیں گواہ بناتا ہوں کہ میں نے اپنا خیبر کا حصہ اس کو حق مہر میں دے دیا ہے تو اس نے وہ حصہ لے کر ایک لاکھ میں فروخت کردیا، راوی کہتے ہیں کہ رسول اللہ (صلی اللہ علیہ وآلہ وسلم) نے فرمایا : بہترین حق مہر وہ ہے جو آسان ہو۔

(١٤٣٣٣) محمد بن یحییٰ ابو الاصغ سے نقل فرماتے ہیں کہ مرد نے اپنی بیوی سے دخول کرلیا لیکن حق مہر اور کچھ بھی نہیں دیا تھا۔

(١٤٣٣٤) عروہ بن زبیر حضرت ام حبیبہ سے نقل فرماتے ہیں کہ وہ عبیداللہ بن جحش کے نکاح میں تھی۔ جب انھوں نے حبشہ کی جانب ہجرت کی تو وہاں فوت ہوگئے۔ رسول اللہ (صلی اللہ علیہ وآلہ وسلم) نے ام حبیبہ سے حبشہ کی زمین میں نکاح کیا اور نجاشی نے یہ فریضہ سر انجام دیا اور ان کا حق مہر چار ہزار تھا۔ نجاشی نے اپنی جانب سے تیار کر کے شرحبیل بن حسنہ کے ساتھ نبی (صلی اللہ علیہ وآلہ وسلم) کے پاس ام حبیبہ کو روانہ کردیا، تمام قسم کا سامان نجاشی کی جانب سے تھا، نبی (صلی اللہ علیہ وآلہ وسلم) نے کچھ بھی اپنی جانب سے ادا نہ کیا اور نبی (صلی اللہ علیہ وآلہ وسلم) کی بیویوں کے حق مہر ٤٠٠ درہم تھے۔

(١٤٣٣٥) حضرت عمر (رض) فرماتے ہیں کہ میں اس غرض سے نکلا تھا کہ عورتوں کو زیادہ حق مہر سے منع کردیا جائے لیکن پھر میں نے یہ آیت پڑھی : { وَّ اٰتَیْتُمْ اِحْدٰلہُنَّ قِنْطَارًا } [النساء ٢٠] ” اور تم ان میں سے کسی کو بھی خزانہ عطا کر دو ۔ “

(١٤٣٣٦) شعبی فرماتے ہیں کہ حضرت عمر بن خطاب (رض) نے لوگوں کو خطبہ ارشاد فرمایا اور اللہ کی حمد وثنا بیان کی اور فرمایا : عورتوں کے حق مہر زیادہ نہ دو اگر مجھے پتہ چلا کہ کسی نے رسول اللہ (صلی اللہ علیہ وآلہ وسلم) سے زیادہ حق مہر ادا کیا ہے، اس کو دیا گیا تو وہ زائد مال بیت المال میں جمع کرا دوں گا۔ پھر منبر سے نیچے آئے تو ایک قریشی عورت نے کہا : اے امیرالمومنین ! کیا کتاب اللہ کی پیروی زیادہ حق رکھتی ہے یا آپ کا قول ؟ حضرت عمر (رض) فرمانے لگے : اللہ کی کتاب، لیکن ہوا کیا ؟ کہنے لگی : آپ نے ابھی لوگوں کو عورتوں کے حق مہر زیادہ اپنے سے منع فرمایا جب کہ اللہ کی کتاب میں ہے : { وَّ اٰتَیْتُمْ اِحْدٰلہُنَّ قِنْطَارًا } [النساء ٢٠] حضرت عمر (رض) فرمانے لگے : ہر ایک عمر (رض) سے زیادہ فقیہ ہے دو یا تین مرتبہ فرمایا۔ پھر منبر کی جانب آئے اور لوگوں سے فرمانے لگے : میں نے تمہیں زیادہ حق مہر دینے سے منع کیا تھا، لیکن مرد اپنے مال میں سے جتنا دینا چاہے اس کی مرضی ہے۔

(١٤٣٣٧) حضرت معاذ بن جبل (رض) فرماتے ہیں کہ خزانے سے مراد ١٢٠٠ اوقیہ ہیں۔
١٢ اوقیہ ٤٨٠ درہم کا ہوتا ہے اور ایک اوقیہ ٤٠ درہم کا۔

(١٤٣٣٨) حضرت ابوہریرہ (رض) فرماتے ہیں کہ خزانے سے مراد ١٢٠٠ سو اوقیہ ہے۔

(١٤٣٣٩) حضرت ابو سعید فرماتے ہیں کہ خزانہ یہ ہے کہ بیل کی کھال کو سونے سے بھر کردینا۔

(١٤٣٤٠) حضرت عبداللہ بن عباس (رض) فرماتے ہیں کہ خزانہ ١٢ ہزار درہم ہوتے ہیں۔
(ب) حضرت عطیہ ابن عباس سے نقل ہیں کہ ١٢ سو دینار اور چاندی سے ١٢ سو مثقال ہوتے ہیں۔
(ج) مجاہد فرماتے ہیں کہ خزانہ سے مراد ٧٠ ہزار دینار ہیں۔
(د) اور سعید بن مسیب فرماتے ہیں کہ ٨٠ ہزار مراد ہیں۔

(١٤٣٤١) زید بن اسلم اپنے والد سے نقل فرماتے ہیں کہ حضرت عمر (رض) نے ام کلثوم بنت علی کو ٤٠ ہزار درہم حق مہر دیا۔