Sunan Al Bayhaqi

(٢٠١٤٩) حضرت حذیفہ (رض) نبی (صلی اللہ علیہ وآلہ وسلم) سے نقل فرماتے ہیں کہ نبی (صلی اللہ علیہ وآلہ وسلم) نے نجران پر ایک آدمی کو حاکم بنا کر روانہ کیا تو اہل نجران نے اس کی شکایت کی۔ آپ (صلی اللہ علیہ وآلہ وسلم) نے فرمایا : میں تمہارے اندر ایک امین آدمی کو بھیج دوں گا، جو امانت کا حق بھی ادا کرے گا تو آپ (صلی اللہ علیہ وآلہ وسلم) کے صحابہ نے دیکھا تو آپ (صلی اللہ علیہ وآلہ وسلم) نے ابوعبیدہ بن جراح کو روانہ کیا۔

(٢٠١٥٠) سعید بن ابی بردہ اپنے والد سے اور وہ اپنے دادا سے نقل فرماتے ہیں کہ نبی (صلی اللہ علیہ وآلہ وسلم) نے اس کو اور معاذ کو یمن کی طرف روانہ کیا۔ آپ (صلی اللہ علیہ وآلہ وسلم) نے فرمایا : آسانی کرنا، تنگی نہ کرنا، خوشخبری دینا، نفرت پیدا نہ کرنا۔ آپس میں موافقت رکھنا، اختلاف نہ پیدا کرنا۔ ان دونوں میں سے ہر ایک کے خیمہ میں فسطاط تھا جس میں روزانہ وہ ایک دوسرے کی زیارت کرتے تھے۔

(٢٠١٥١) حضرت معاذ بن جبل (رض) فرماتے ہیں : جب نبی (صلی اللہ علیہ وآلہ وسلم) نے ان کو یمن کی طرف روانہ کیا، نبی (صلی اللہ علیہ وآلہ وسلم) ان کے ساتھ نکلے اور وصیت فرما رہے تھے۔ حضرت معاذ سوار تھے، جبکہ نبی (صلی اللہ علیہ وآلہ وسلم) پیدل چل رہے تھے۔ جب وصیت سے فارغ ہوئے تو فرمایا : اے معاذ ! ممکن ہے آئندہ سال تو مجھے نہ مل سکے، شاید تیرا گزر میری مسجد اور میری قبر کے پاس ہو۔

(٢٠١٥٢) سیدنا ابوہریرہ (رض) فرماتے ہیں کہ رسول اللہ (صلی اللہ علیہ وآلہ وسلم) نے حضرت عمر بن خطاب (رض) کو صدقہ وصول کرنے کے لیے روانہ کیا۔

(٢٠١٥٣) حضرت علی (رض) فرماتے ہیں کہ نبی (صلی اللہ علیہ وآلہ وسلم) نے مجھے یمن کا قاضی بنا کر روانہ کیا۔ میں نے کہا : اے اللہ کے رسول ! میں نوجوان ہوں اور آپ مجھے بڑی عمر والوں کی طرف روانہ کر رہے ہیں۔ آپ (صلی اللہ علیہ وآلہ وسلم) نے مجھے دعائیں دیں اور فرمایا : دو جھگڑا کرنے والوں میں سے ایک کی بات سن کر فیصلہ نہ کرنا جب تک دوسرے کی بات نہ سن لی جائے۔ یہ زیادہ بہتر ہے۔ فرماتے ہیں : اس کے بعد میرے اوپر کوئی فیصلہ مختلف نہیں ہوا۔

(٢٠١٥٤) حضرت علی (رض) فرماتے ہیں کہ رسول اللہ (صلی اللہ علیہ وآلہ وسلم) نے مجھے یمن روانہ کیا۔ میں نے کہا : اے اللہ کے رسول ! میں نوجوان ہوں مجھے فیصلوں کے بارے میں علم نہیں ہے ؟ آپ (صلی اللہ علیہ وآلہ وسلم) نے فرمایا : جاؤ اللہ آپ کی رہنمائی فرمائے گا اور آپ کی زبان کو بھی ثابت رکھے گا۔ اس کے بعد میں نے دو آدمیوں کے درمیان فیصلہ کرنے میں کبھی شک بھی محسوس نہیں کیا۔

(٢٠١٥٥) حضرت علی (رض) سے سننے والا ایک آدمی بیان کرتا ہے کہ جب مجھے رسول اللہ (صلی اللہ علیہ وآلہ وسلم) نے یمن کی طرف روانہ کیا، میں نے کہا : اے رسول اللہ (صلی اللہ علیہ وآلہ وسلم) ! آپ مجھے روانہ کر رہے ہیں اور میں نوجوان آدمی ہوں۔ اکثر فیصلوں کے بارے میں مجھے علم نہیں ہے۔ فرماتے ہیں کہ رسول اللہ (صلی اللہ علیہ وآلہ وسلم) نے میرے سینے پر ہاتھ مارا اور فرمایا : اللہ تیری زبان کو ثابت رکھے گا اور آپ کے دل کو رہنمائی فرمائے گا۔ اس کے بعد مجھے دو آدمیوں کے درمیان فیصلہ میں مشکل پیش نہیں آئی۔

(٢٠١٥٦) محارب بن دثار فرماتے ہیں : جب ابوبکر صدیق (رض) خلیفہ بنے تو انھوں نے حضرت عمر (رض) کو قاضی بنایا اور ابوعبیدہ (رض) کو بیت المال کا خزانچی مقرر فرمایا اور فرمایا : میری مدد فرمانا۔ حضرت عمر (رض) ایک سال تک قاضی رہے، صرف دو فیصلے ان کے پاس آئے یا تو انھوں نے صرف دو فیصلے کیے۔

(٢٠١٥٧) عامر بن شقیق فرماتے ہیں کہ اس نے ابو وائل سے سنا، وہ فرماتے ہیں کہ حضرت عمر (رض) نے عبداللہ بن مسعود (رض) کو قاضی اور بیت المال کا خزانچی مقرر فرمایا۔

(٢٠١٥٨) عامر فرماتے ہیں کہ حضرت عمر بن خطاب (رض) نے ابن مسعود (رض) کو بصرہ کا قاضی مقرر کیا اور شریح کو کوفہ کا قاضی مقرر فرمایا۔