Sunan Al Bayhaqi

(١٦٧٥) عکرمہ بن خالد طاؤس سے حدیث نقل فرماتے ہیں کہ ایک شخص سیدنا ابن عمر (رض) کے پاس آیا اور کہا : اے ابوعبدالرحمن ! تو جہاد کیوں نہیں کرتا ؟ انھوں نے کہا : میں نے رسول اللہ (صلی اللہ علیہ وآلہ وسلم) سے سنا کہ اسلام کی بنیاد پانچ چیزوں پر ہے : اس بات کی گواہی دینا کہ اللہ کے سوا کوئی معبود نہیں ، نماز قائم کرنا، زکوۃ ادا کرنا ، ، حج کرنا اور رمضان کے روزے رکھنا۔

(١٦٧٦) سیدنا عثمان بن عفان (رض) سے روایت ہے کہ آپ (صلی اللہ علیہ وآلہ وسلم) نے فرمایا : ” جس شخص نے جان لیا کہ نماز حق ہے، واجب ہے یا فرض ہے تو وہ جنت میں داخل ہوگا۔ “

(١٦٧٧) سیدنا سعد بن ہشام (رض) سے روایت ہے کہ وہ سیدہ عائشہ (رض) کے پاس آئے اور عرض کیا : اے ام المؤمنین ! مجھے نبی (صلی اللہ علیہ وآلہ وسلم) کے قیام کے متعلق بتائیں، انھوں نے کہا : کیا تو نے { یَا أَیُّہَا الْمُزَّمِّلُ } نہیں پڑھی ؟ صحابی کہتا ہے کہ میں نے کہا : کیوں نہیں ! سیدہ عائشہ (رض) نے فرمایا : اللہ تعالیٰ نے ابتدائے سورت میں قیام فرض کیا تھا، رسول اللہ (صلی اللہ علیہ وآلہ وسلم) اور آپ کے اصحاب ایک سال تک قیام کرتے رہے، یہاں تک کہ ان کے قدم سوج گئے اور اللہ نے سورت کا آخری حصہ آسمان میں بارہ ماہ تک رو کے رکھا، پھر اللہ نے سورت کے آخر میں تخفیف نازل فرمائی تو فرض کے بعد رات کا قیام نفلی ہوگیا۔

(١٦٧٨) نافع سے روایت ہے کہ سیدنا عبداللہ بن عمر (رض) فرماتے تھے کہ دلوک شمس سے مراد اس کا جھک جانا ہے۔

(١٦٧٩) سیدنا عبداللہ بن عباس (رض) فرماتے تھے ” دلوک شمس سے مراد “ جب سایہ لوٹ آئے۔ غسق اللیل رات کا چھا جانا اور اس کا اندھیرا ہے۔

(١٦٨٠) سیدنا قتادۃ اللہ تعالیٰ کے فرمان { لِدُلُوکِ الشَّمْسِ } کے متعلق کہتے ہیں کہ جب سورج آسمان کے درمیان سے ظہر کی نماز کے وقت رات کی سیاہی تک جھک جائے اور فرمایا : رات کی ابتدا مغرب کی نماز ہے۔

(١٦٨١) سیدنا ابوہریرہ (رض) فرماتے ہیں کہ میں نے رسول اللہ (صلی اللہ علیہ وآلہ وسلم) کو فرماتے ہوئے سنا : جماعت کے ساتھ نماز ادا کرنا اکیلے نماز پڑھنے سے پچیس درجے افضل ہے اور فجر کی نماز میں رات اور دن کے فرشتے جمع ہوتے ہیں، پھر فرمایا : اگر تم چاہتے ہو تو یہ پڑھو۔ { وَقُرْآنَ الْفَجْرِ إِنَّ قُرْآنَ الْفَجْرِ کَانَ مَشْہُودًا } [بنی اسرائیل ]

(١٦٨٢) سیدنا قیس بن أبی حازم کہتے ہیں کہ میں نے جریر بن عبداللہ (رض) سے سنا کہ ہم رسول اللہ (صلی اللہ علیہ وآلہ وسلم) کے پاس بیٹھے ہوئے تھے، اچانک آپ (صلی اللہ علیہ وآلہ وسلم) نے بدر کی رات چاند کی طرف دیکھا، پھر فرمایا : تم اپنے رب کو اس طرح دیکھو گے جس طرح تم اس چاند کو دیکھ رہے ہو، تم اس کے دیکھنے میں بھیڑ محسوس نہیں کرتے، اگر تم طاقت رکھوتو تمہیں نماز پر غلبہ نہ دیا جائے۔ اسماعیل کہتے ہیں کہ تم سے نماز فوت نہ ہوجائے (سورج طلوع سے پہلے اور غروب ہونے سے پہلے یعنی عصر اور فجر) پھر جریر نے یہ آیت پڑھی { فَسَبِّحْ بِحَمْدِ رَبِّکَ قَبْلَ طُلُوعِ الشَّمْسِ وَقَبْلَ غُرُوبِہَا }

(١٦٨٣) نافع بن ازدق سیدنا ابن عباس (رض) کے پاس تشریف لائے اور پوچھا : پانچوں نمازیں قرآن میں ہیں ؟ انھوں نے کہا : جی ہاں ! پھر انھوں نے یہ آیت پڑھی { فَسُبْحَانَ اللَّہِ حِینَ تُمْسُونَ } اور فرمایا : یہ مغرب کی نماز ہے { وَحِینَ تُصْبِحُونَ } یہ فجر کی نماز ہے { وَعَشِیًّا } یہ عصر کی نماز ہے { وَحِینَ تُظْہِرُونَ } یہ ظہر کی نماز ہے اور یہ آیت پڑھی { وَمِنْ بَعْدِ صَلاَۃِ الْعِشَائِ ثَلاَثُ عَوْرَاتٍ لَکُمْ }

(١٦٨٤) حسن بصری (رح) اللہ تعالیٰ کے ارشاد { فَسُبْحَانَ اللَّہِ حِینَ تُمْسُونَ } کے متعلق فرماتے ہیں : مغرب اور عشا کی نماز ہے { وَحِینَ تُصْبِحُونَ } سے صبح کی نماز { وَلَہُ الْحَمْدُ فِی السَّمَوَاتِ وَالأَرْضِ وَعَشِیًّا } سے اس سے مرادعصر کی نماز اور { وَحِینَ تُظْہِرُونَ } سے ظہر کی نماز (مراد ہے) ۔