Sunan Al Bayhaqi

(١٩٠٠٥) علی بن ابی طلحہ حضرت عبداللہ بن عباس (رض) سے اللہ کے اس قول : { وَانْحَرْ ۔ } [الکوثر ٢] کے بارے میں فرماتے ہیں کہ قربانی کے دن ذبح کرو۔

(١٩٠٠٦) حضرت انس بن مالک فرماتے ہیں کہ رسول اللہ (صلی اللہ علیہ وآلہ وسلم) دو مینڈھے قربانی کرتے ۔ انس کہتے ہیں : میں بھی دو مینڈھے قربانی کیا کرتا تھا۔

(١٩٠٠٧) حضرت انس (رض) فرماتے ہیں کہ رسول مکرم (صلی اللہ علیہ وآلہ وسلم) نے دو ایسے مینڈھے قربانی کیے جو خاکستری رنگ اور سینگوں والے تھے۔ آپ (صلی اللہ علیہ وآلہ وسلم) نے اپنا قدم ان کی گردنوں پر رکھ کر بِسْمِ اللّٰہِ وَ اللّٰہُ اَکْبَرُ کہا تھا اور انھیں اپنے ہاتھ سے ذبح کیا تھا۔

(١٩٠٠٨) حضرت انس بن مالک فرماتے ہیں کہ رسول معظم (صلی اللہ علیہ وآلہ وسلم) نے دو ایسے مینڈھے قربان کیے جو خاکستری رنگ اور سینگوں والے تھے۔ آپ (صلی اللہ علیہ وآلہ وسلم) نے ان کی گردنوں پر اپنا قدم رکھ کر ان کو ذبح کرتے وقت بِسْمِ اللّٰہِ وَ اللّٰہُ اَکْبَرُ پڑھا۔

(١٩٠٠٩) عبداللہ بن محمد بن عقیل بن ابی طالب حضرت علی بن حسین سے اللہ کے اس فرمان : { لِکُلِّ اُمَّۃٍ جَعَلْنَا مَنْسَکًا ھُمْ نَاسِکُوْہُ } [الحج ٦٧] ” ہم نے ہر امت کے لیے عبادت کا طریقہ مقرر کیا، جس طرح وہ عبادت کرتے ہیں۔ “ فرمایا : اس کے مطابق وہ ذبح کرنے والے ہیں۔ ابو رافع فرماتے ہیں کہ رسول اللہ (صلی اللہ علیہ وآلہ وسلم) نے ایسے دو مینڈھے جو خاکستری رنگت، سینگوں والے، موٹے تازے خریدے۔ خطبہ اور نماز کے بعد آپ (صلی اللہ علیہ وآلہ وسلم) نے اپنے ہاتھ سے چھری کے ساتھ ایک مینڈھا ذبح فرمایا۔ پھر فرمایا : اے اللہ ! یہ میری امت کی جانب سے ہے جو تیری وحدانیت اور میری رسالت کی گواہی دے۔ پھر دوسرا مینڈھا لایا گیا آپ (صلی اللہ علیہ وآلہ وسلم) نے ذبح فرمایا : پھر فرمایا یہ محمد اور آل محمد کی جانب سے ہے۔ پھر مسکینوں کو گوشت کھلا دیا اور خود بھی اور گھر والوں کو بھی کھلایا۔ ہم دو سال ٹھہرے رہے کہ احد نے ہمارے قرض اور مشقت کو دور کردیا۔ بنو ہاشم میں سے کسی نے قربانی نہ کی تھی۔

(١٩٠١٠) مخنفبن سلیم فرماتے ہیں کہ ہم نے نبی (صلی اللہ علیہ وآلہ وسلم) کے ساتھ وقوف عرفہ کیا۔ آپ (صلی اللہ علیہ وآلہ وسلم) نے فرمایا : ہر گھر والوں پر ہر سال میں قربانی اور عتیرہ ہے۔ کیا تم عتیرہ کے بارے میں جانتے ہو ؟ راوی کہتے ہیں : ان کے جواب کو میں نہیں جانتا ۔ پھر فرمایا : یہ وہ ہے جس کو لوگ رجبیہ کہتے ہیں، یعنی ایسا جانور جو ماہ رجب میں ذبح کرنے کے لیے مخصوص کیا جاتا۔

(١٩٠١١) آل اشعث کی عورت اپنی ایک بوڑھیا سے نقل فرماتی ہے جس کو غامدی وفد نے نبی (صلی اللہ علیہ وآلہ وسلم) کے پاس سے آتے ہوئے خبر دی کہ آپ (صلی اللہ علیہ وآلہ وسلم) نے فرمایا : مسلمانوں کے ہر گھر پر قربانی اور عتیرہ ہے۔

(١٩٠١٢) حضرت ابوہریرہ (رض) فرماتے ہیں کہ رسول اللہ (صلی اللہ علیہ وآلہ وسلم) نے فرمایا : جو طاقت ہوتے ہوئے قربانی نہ کرے وہ ہماری عید گاہ کے قریب نہ آئے۔

(١٩٠١٣) سعید بن مسیب حضرت ابوہریرہ (رض) سے نقل فرماتے ہیں کو جو وسعت کے باوجود قربانی نہ کرے وہ ہماری عید گاہ کے قریب نہ آئے۔

(١٩٠١٤) حضرت عبداللہ بن عباس (رض) نبی (صلی اللہ علیہ وآلہ وسلم) سے نقل فرماتے ہیں کہ آپ (صلی اللہ علیہ وآلہ وسلم) نے فرمایا : چاندی کی کوئی چیز خرچ کی جائے یہ عید کے دن قربانی کرنے سے افضل ہے۔